Fiskvinnslunámskeið á Suðureyri

Frá lokahófi. Íslandssaga sá um veitingar.

Nemendur voru af 4 þjóðernum og því þurfti túlka.

Auður Helga Ólafsdóttir að kenna skyndihjálp.

« 1 af 4 »

Í gær, fimmtudaginn 7. janúar, lauk starfsfræðslunámskeiðum fyrir fiskvinnslufólk á Suðureyri. Fyrirtækið Íslandssaga notaði tækifærið þegar vinnsla féll niður á milli hátíðanna og í upphafi nýs árs og sendi starfsfólk sitt í nám; bæði 40 klukkustunda grunnnám og 8 klst. viðbótarnám. Auk starfsfólks Íslandssögu tóku nokkrir starfsmenn úr fyrirtækinu Klofningi námið.

Grunnnáminu luku 37 manneskjur þar af 4 úr Klofningi og viðbótarnáminu 42, en nokkrir höfðu tekið grunnnámið áður.

Fræðslumiðstöð Vestfjarða útvegaði kennara, túlka og námsefni.

Kennt var í Bjarnarborg, húsi Verkalýðsfélags Vestfirðinga. 

Starfsfræðslunámskeiðum fyrir fiskvinnslufólk er ætlað að efla starfsfólk fyrirtækjanna bæði faglega og persónulega og skapa þannig hæfara starfsfólk. Námið er bundið kjarasamningum og veitir launahækkun.

Meðfylgjandi myndir eru frá námskeiðunum.

• föstudagurinn 8. janúar 2016

Kynningar á námi

Mánudaginn 11. janúar n.k. verður kynning á tvenns konar námi hjá Fræðslumiðstöð Vestfjarða.

Annars vegar verður kynning á íslenskunámskeiðum fyrir fólk með annað móðurmál en íslensku. Sú kynning verður í húsakynnum miðstöðvarinnar að Suðurgötu 12 á Ísafirði og hefst kl. 18.

Hins vegar er kynning á Hönnunar- og tilraunasmiðju í FabLab sem er nýtt nám hjá Fræðslumiðstöðinni ætlað fólki 20 ára eða eldra, með stutta formlega menntun og sem er á vinnumarkaði. Sú kynning fer fram í FabLab smiðjunni í Menntaskólanum á Ísafirði og hefst einnig kl. 18.

Báðar þessar kynningar eru öllum opnar. Áhugasamir eru hvattir til að mæta og sjá hvort þarna er eitthvað sem getur hentar.

• föstudagurinn 8. janúar 2016
• Dagný Sveinbjörnsdóttir