Í mörg ár hefur eitt af fyrstu námskeiðum ársins hjá Fræðslumiðstöð Vestfjarða verið Smáskipanám. Í ár verður ekki brugðið út af vananum því fyrirhugað er að hefja Smáskipanámið þriðjudaginn 19. janúar.
Smáskipanámið hefur alltaf notið nokkurra vinsælda enda hagnýtt nám sem getur gefið atvinnuréttindi. Smáskipanámið kemur í stað þess sem áður var nefnt 30rl réttindanám (pungapróf) og miðast atvinnuskírteinin nú við lengd skipa í stað brúttórúmlestatölu áður. Réttindin miðast skv. því við skip 12 metrar og styttri að skráningarlengd, m.v. að hafa lokið 12 mánaða siglingatíma skv. reglugerð nr. 393/2008. Námið er kennt með faglegri ábyrgð Skipstjórnarskóla Tækniskólans.
Námið samanstendur af nokkrum námsþáttum og þarf að ljúka þremur þeirra með skriflegu prófi.
Námið hefst 19. janúar 2016 og lýkur í apríl. Kennt verður þriðjudaga og fimmtudaga kl. 20:15-22:15 og einhverja laugardaga kl. 9:00-12:00.
Kennar er Guðbjörn Páll Sölvason, umsjónarmaður sjódeildar hjá Fræðslumiðstöðinni og margreyndur á þessu sviði.
Þátttökugjald er 139.900 kr. Vakin er athygli á því að oft er hægt að sækja um styrk í endurmenntunarsjóði stéttarfélaga til endurgreiðslu á hluta námskeiðsgjalds.
Nánari upplýsingar og skráning er hér á vefnum eða í síma 456 5025.
Þess má að lokum geta að nú þegar eru tveir hópar í Smáskipanámi hjá Fræðslumiðstöðinni, annars vegar á Hólmavík og hins vegar nemendur í 10. bekk Grunnskólans á Ísafirði. Þá er fyrirhugað er að bjóða upp á Smáskipanám á Bíldudal síðar í vetur.
- miðvikudagurinn 13. janúar 2016
- Dagný Sveinbjörnsdóttir
Fræðslumiðstöð Vestfjarða, í samvinnu við ýmsar stofnanir og samtök, efnir til raða fyrirlestra árið 2016 um ýmis mál sem sérstaklega varða fólk sem komið er á miðjan aldur.
Eftir hefðbundið ævistarf bíður margra spennandi tímar með nýjum viðfangsefnum, oft kallað þriðja skeiðið. Til að njóta þessa æviskeiðs sem best er gott að undirbúa sig með því að þekkja réttindi sín, skyldur og tækifæri. Þessari fyrirlestraröð er ætlað að kynna fólki sitthvað er máli skiptir til að auka líkur á gefandi efri árum. Fyrirlestraröðin er einkum ætluð fólki sem komið er á miðjan aldur, en allir eru velkomnir.
Fyrirlestrarnir verða annan fimmtudag hvers mánaðar kl. 17-19 í húsakynnum Fræðslumiðstöðvarinnar að Suðurgötu 12 á Ísafirði. Einnig er hægt að senda þá út um fjarfundabúnað til þeirra staða þar sem slíkur búnaðir eru og eftir verður óskað.
Þátttökugjald er 1.000 kr. á þátttakenda á hvern fyrirlestur.
Fyrsti fyrirlesturinn verður fimmtudaginn 14. janúar 2016. Þá mun Guðrún Guðmundsdóttir viðskiptafræðingur fjalla um lífeyrissjóði; mismunandi uppbyggingu þeirra, réttindi sjóðsfélaga og að hverju helst þarf að hyggja við töku lífeyris.
Meðal annarra efna sem fjallað verður um í fyrirlestraröðinni eru almannatryggingar, stéttarfélög, lýðheilsa, mataræði og hreyfing, þjónusta sveitarfélaga, frjáls félagasamtök, öryggi og slysavarnir.
Þótt um fyrirlestra sé að ræða er ágætt að fólk skrái sig. Tekið er við skráningum á fyrirlestrana á vef Fræðslumiðstöðvar Vestfjarða www.frmst.is og í síma 456 5025.
- mánudagurinn 11. janúar 2016
- Dagný Sveinbjörnsdóttir
