Fræðslumiðstöð Vestfjarða og Félag opinberra starfsmanna á Vestfjörðum gera með sér samstarfssamning

Samningurinn hefur það markmið að veita aðilum Félags opinberra starfsmanna á Vestfjörðum greiðari aðgang að námskeiðum Fræðslumiðstöðvar. Þannig mun starfsmenntasjóður FOS-Vest greiða fyrir þátttöku félagsmanna á námskeiðum miðstöðvarinnar enda sé styrkréttur félagsmanns staðfestur. Hámarksstyrkur hvers félagsmanns á hverju tólf mánaða tímabili er samkvæmt reglum sjóðsins hverju sinni. Samningurinn er tilraunaverkefni til loka ársins 2020.

Hagsmunir aðila FOS-Vest og Fræðslumiðstöðvar fara saman með gerð samningsins en það er að efla sí- og endurmenntun í heimabyggð. Með aukinni þátttöku í sí- og endurmenntun má búast við að hæfni og þekking á vinnumarkaði aukist sem og velferð. Þetta er hagsmunamál enda er það eitt af markmiðum sóknaráætlunar fyrir Vestfirði að tryggja aðgengi að menntun og með því stuðla að hækkuðu menntunarstigi í fjórðungnum. Spennandi er að sjá hvort verkefnið verður til þess að auka þátttöku félagsmanna FOS-Vest í sí- og endurmenntun.

• miðvikudagurinn 16. september 2020
• Sædís María Jónatansdóttir

Námskeið með stuðningi starfsmenntasjóða

Starfsmenntasjóðirnir Landsmennt, Ríkismennt og Sveitamennt bjóða aðildarfélögum upp á að sækja fjarkennd námskeið frítt til 31. Desember 2020.

Á Vestfjörðum eru þetta félagsmenn í  VerkVest og Verkalýðs- og sjómannafélagi Bolungavíkur sem starfa á vegum ríkis eða sveitarfélaga eða starfa samkvæmt kjarasamningi Starfsgreinasambandsins og Samtaka atvinnulífsins (þ.e. flestir sem starfa á almennum markaði fyrir utan verslunar- og skrifstofufólk).

Við hvetjum alla til að kanna aðild síns stéttafélags að þessum starfsmenntasjóðum.

Sameyki stéttarfélag í almannaþjónustu greiðir einnig þátttökugjöld fyrir sína félagsmenn á tiltekin námskeið bæði fjar- og staðkennt. Kemur það þá fram í námskeiðslýsingu hjá Fræðslumiðstöð Vestfjarða þegar það á við.  

Fræðslumiðstöð Vestfjarða vonar að sem flestir nýti sér þetta góða tækifæri til þess að sækja sér fræðslu og er starfsfólk miðstöðvarinnar boðið að veita nánari upplýsingar ef þörf er á.

• föstudagurinn 28. ágúst 2020
• Dagný Sveinbjörnsdóttir