Þrjú íslenskunámskeið eru á dagskrá hjá Fræðslumiðstöð Vestfjarða nú í byrjun maí. Mánudaginn 4. maí hefst Íslenska 1a sem ætlað er byrjendum eða fólki sem hefur mjög lítinn grunn í málinu. Kennt verður hvern virkan morgun kl. 10-12 í tvær vikur, alls í 10 skipti. Námskeiðið er því upplagt fyrir fólk sem er ekki í vinnu eða laust við á þessum tíma dagsins. Kennari er Ólöf Bergmannsdóttir.
Sama dag, mánudaginn 4. maí hefst Íslenska 2a. Það námskeið er ætlað fólki sem er komið með smá grunn í málinu. Kennt verður á mánudögum og miðvikudögum kl. 17:30-19:30, í 10 skipti alls. Kennari er Kesja Szczukiecka Pacholek.
Þriðjudaginn 5. maí hefst Íslenska 3a, námskeið ætlað fólki sem komið er vel af stað í íslensku en vill bæta orðaforða, skilning og málfræði. Námskeiðið verður kennt á þriðjudögum og fimmtudögum kl. 17:30-19:30, í 10 skipti alls. Kennari er Ólöf Bergmannsdóttir.
Námskeiðin eru kennd í gegnum fjarfundakerfið Zoom. Nemendur geta tekið þátt í gegnum tölvu, síma eða önnur snjalltæki. Hvert námskeið kostar 27.000 kr.
Starfsmenntasjóðirnir Ríkismennt, Sveitamennt og Landsmennt greiða námskeiðsgjaldið að fullu fyrir þá félagsmenn í VerkVest og Verkalýðs- og sjómannafélagi Bolungavíkur sem starfa á vegum ríkis eða sveitarfélaga eða samkvæmt kjarasamningi SGS og SA (hér eru flestir sem starfa á almennum markaði fyrir utan verslunar- og skrifstofufólk).
Fræðslumiðstöðin hvetur fólk til þess að hafa samband við sitt stéttarfélag til að kanna með aðild að starfsmennasjóði og stuðning til náms.
Nánari upplýsingar veitir Barbara Gunnlaugsson barbara@frmst.is
- þriðjudagurinn 28. apríl 2020
- Dagný Sveinbjörnsdóttir
Nokkrir þátttakendur á vefnámskeiðinu Forræktun mat- og kryddjurta
Fræðslumiðstöð Vestfjarða býður upp á nokkur stutt vefnámskeið/fyrirlestra fyrir íbúa á Vestfjörðum í samstarfi við Vestfjarðastofu, Sameyki og starfsmenntasjóði sem eiga aðild að Landsmennt, Ríkismennt og Sveitamennt. Námskeiðin eru kennd á vefnum í fjarfunda forritinu Zoom.
Auðvelt er að sækja Zoom forritið fyrir tölvu, spjaldtölvu eða síma og það er frekar einfalt í notkun, en það með þetta eins og annað, æfingin skapar meistarann. Hægt er að fara inn á zoom.us og sækja forritið en einnig er hægt að fara í App store og Google Play til að sækja app fyrir Zoom.
Vefnámskeiðin eru opin öllum íbúum á Vestfjörðum og þátttakendum að kostnaðarlausu. Námskeiðin eru auglýst á heimasíðu miðstöðvarinnar frmst.is og á Facebook. Skráning er á heimasíðunni eða í síma 456-5025 en jafnan eru 15-20 pláss á hverju námskeiði. Fræðslumiðstöð sendir svo skráðum þátttakendum Zoom tengil inn á námskeiðin. Auðvitað er hægt að fá leiðbeiningar og aðstoð við að tengjast hjá starfsfólki miðstöðvarinnar.
Tvö námskeið eru nú þegar búin, Forræktun mat- og kryddjurta með Auði Ottesen og Matseðill vikunnar, undirbúningur og innkaup með Salóme Ingólfsdóttur. Tvö námskeið eru komin á dagskrá eftir páska, það eru námskeiðin Á eigin skinni með Sölva Tryggvasyni og Þarmaflóran með Önnu Ottesen. Fleiri vefnámskeið eru í undirbúningi og rétt er að minna á að við þiggjum ábendingar og hugmyndir að áhugaverðum námskeiðum. Margir starfsmenntasjóðir niðurgreiða námskeið fyrir sína félagsmenn en greiðsluþátttaka er þó mismunandi.
Starfsfólk Fræðslumiðstöðvar þakkar Vestfjarðastofu og starfsmenntasjóðunum fyrir samstarfið um námskeiðin og vonar þátttakendur hafi gagn og gaman af.
Gleðilega páska
Sædís María Jónatansdóttir og starfsfólk Fræðslumiðstöðvar Vestfjarða
- þriðjudagurinn 7. apríl 2020
- Sædís María Jónatansdóttir
