Radar – gjöf frá Brimrúnu

Nú er verið að koma fyrir radar á Vestrahúsinu á Ísafirði. Hann er gjöf frá fyrirtækinu Brimrúnu ehf til Fræðslumiðstöðvar Vestfjarða. Radarinn er af gerðinni Furuno, með 64 sjómíla langdrægni, innbyggðu sjókorti, kortaplotter og 20 tomma litaskjá. Radarinn er notaður en ný yfirfarinn og í ágætu standi. Fyrirtækið Særaf á Ísafirði hafði milligöngu um gjöfina og sér um uppsetningu ásamt Vélsmiðjunni Þristi.

Menn frá Særafi og Þristi voru einmitt í góða veðrinu í dag, upp á þaki á Vestrahúsinu að koma radarnum fyrir.

Fræðslumiðstöð Vestfjarða þakkar fyrir þessa góðu gjöf, sem mun nýtast vel við kennslu í skipstjórnarnáminu.

• föstudagurinn 2. maí 2014

Fyrri hluta viðbótarnáms í vélstjórn lokið

Frá því í janúar hafa sex vaskir menn lagt stund á viðbótarnám í vélstjórn hjá Fræðslumiðstöð Vestfjarða í samvinnu við Menntaskólann á Ísafirði. Námið er blanda af fjarnámi og staðarlotum á Ísafirði og nú um síðustu helgi lauk síðustu lotu þessarar annar. Þetta misserið hafa nemendurnir numið kælitækni og vélstjórn en í haust ljúka þeir náminu með því að taka áfanga í rafmagnsfræði.

• mánudagurinn 28. apríl 2014
• Dagný Sveinbjörnsdóttir