Fræðslumiðstöð Vestfjarða hefur nú opnað aftur eftir sumarleyfi og starfsfólkið er komið til vinnu.
Nú er verið að undirbúa útgáfu námsvísis fyrir veturinn 2015 – 2016 og munu námskeiðin tínast inn á vefinn á næstunni. Námsvísirinn kemur svo út um mánaðamótin ágúst/september.
Okkur finnst ágætt að vera komin aftur í rútínuna; getað fengið sér kaffi og átt notalegt spjall við samstarfsfólk og gesti og dundað aðeins í tölvunni á milli.
Unga fólkið heimsótti Fræðslumiðstöðina í dag, en þar var á ferð stór hópur sem sækir námskeið hjá Rauða krossinum sem nefnist Mannúð og menning / Gleðidagar í Barnaskólanum í Hnífsdal.
Námskeiðið er ætlað börnum á aldrinum 6-9 ára og er lögð áhersla á fræðslu og leiki í tengslum við hugsjónir Rauða krossins um mannúð og óhlutdrægni. Börnin fá einnig innsýn í skyndihjálp, fjölmenningu og umhverfisvernd. Eldri borgarar koma í heimsókn og farið verður í útileiki og vettvangsferðir.
Gaman er að fá svona flottan hóp í heimsókn. Þau fengu að skoða sig um í Fræðslumiðstöðinni og Rauða krossinum og síðan horfðu þau á myndband um slysavarnir.
