Smákaffipása á milli matsviðtala. Einn hefur lokið og næsti tilbúinn. F.v. Agnar Ebeneser Agnarsson, Björn Hafberg ráðgjafi, Björgvin Þór Steinsson matsaðili og Árni Freyr Elíasson.
Um síðustu helgi lauk 21 maður raunfærnimati í skipstjórnargreinum hjá Fræðslumiðstöð Vestfjarða. Áður höfðu 7 lokið matinu hjá miðstöðinni. Þeir sem gengust undir raunfærnimatið luku að meðaltali rúmlega 6 áföngum og fengu að meðaltali 12 einingar metnar. Langflestir þeirra stunda skipstjórnarnám við Menntaskólann á Ísafirði og fá staðna áfanga úr raunfærnimatinu metna inn í það nám. Matsaðilar voru þeir Björgvin Þór Steinsson og Kjartan Örn Kjartansson kennarar við Skipstjórnarskóla Íslands. Raunfærnimatið var hluti af átaksverkefninu um hækkun menntunarstigs í Norðvesturkjördæmi og fjármagnað af Fræðslusjóði framhaldsfræðslunnar sem er í umsjá Fræðslumiðstöðvar atvinnulífsins.
Í skipstjórnargreinum er að hámarki er hægt að gangast undir raunfærnimat í 22 einingum í samtals 10 áföngum. Til að geta gengist undir matið þurfa menn að vera orðnir 25 ára og hafa verið að minnsta kosti 1125 daga lögskráðir til sjós. Raunfærnimat í skipstjórnargreinum var þróað af símenntunarmiðstöðinni Visku í Vestmannaeyjum og var Sólrún Bergþórsdóttir, náms- og starfsráðgjafi miðstöðvarinnar til ráðgjafar við allt ferlið.
Flestir þátttakendanna voru af norðanverðum Vestfjörðum. Áður höfðu 14 manns í kjördæminu lokið raunfærnimati í skipstjórnargreinum hjá símenntunarmiðstöðinni Visku í Vestmannaeyjum, þar af 8 af Vestfjörðum.
Með raunfærnimatinu fá menn viðurkennda þekkingu sína og færni, sem þeir hafa aflað sér á vinnumarkaði, á móti áföngum í viðkomandi námi. Fer matið eftir ákveðnu verkferli, þar sem menn meta með aðstoð náms- og starfsráðgjafa, hvaða áfanga þeir eiga möguleika á að fá metna. Sá Björn Hafberg um allan undirbúning og er óhætt að fullyrða að hann eigi mestan heiður af því að svo margir náðu að ljúka matinu með þessari góðu útkomu.
- föstudagurinn 10. október 2014
-
Eygló Harðardóttir félags- og húsnæðismálaráðherra og Matthías Páll Imsland, aðstoðarmaður ráðherra funduðu með aðilum sem tengdust ráðstefnunni.
Íslenskunám og fjölmenningarsamfélagið var viðfangsefni fróðlegrar ráðstefnu sem haldin var í Edinborgarhúsinu á Ísafirði, miðvikudaginn 8. október, á vegum tilraunaverkefnanna Menntun núna í Norðvesturkjördæmi og í Breiðholti og í samvinnu við Fjölmenningarsetur. Áherslan var á íslenskunám og ólíkar kennsluaðferðir sem þróaðar hafa verið á undanförnum árum ásamt því að kynna áhrifaríkar aðferðir til að auka þátttöku innflytjenda í samfélaginu en þar gegnir tungumálið einmitt lykilhlutverki. Ráðstefnuna sóttu tæplega 50 þátttakendur. Aðstandendur ráðstefnunnar hittu félagsmálaráðherra á Ísafirði í dag og ræddu um ráðstefnurnar og stefnu stjórnvalda í málefnum innflytjenda.
Á morgun, föstudaginn 10. október verður framhaldsráðstefna í Gerðubergi í Breiðholti þar sem m.a. menntamálaráðherra og innanríkisráðherra munu flytja erindi auk formanns Innflytjendaráðs og Fjölmenningaráðs Reykjavíkurborgar, fulltrúa hverfisráðs og leikskóla. Mirela Protopapa frá Albaníu greinir frá hennar reynslu af því að flytja til Íslands og fjallað verður um áhersluatriði frá ráðstefnunni á Ísafirði. Óskar Dýrmundur Ólafsson, hverfisstjóri Breiðholts, stýrir ráðstefnunni sem er öllum opin og hefst kl. 13 í Gerðubergi.
Íslenskuþorpið er dæmi um nýstárleg leið í tungumálanámi sem Guðlaug Stella Brynjólfsdóttir kynnti á ráðstefnunni á Ísafirði. Íslenskuþorpið myndar brú úr kennslustofunni yfir í þátttöku í samfélaginu þannig að nemendur sinna daglegum erindum sínum eins og að fara á bókasafn, í bakarí, í sundlaugar og þjálfa íslenskuna um leið. Markmiðið er m.a. að flýta fyrir frekara námi og þátttöku á íslensku í samfélaginu. Dr. Guðrún Theodórsdóttir er hugmyndasmiðurinn að íslenskuþorpinu og var doktorsrannsókn hennar nýtt til að hanna marvisst og sérsniðið námsumhverfi innan raunverulegra fyrirtækja og stofnana úti í samfélaginu. Unnið er að leiðbeiningum um hvernig setja megi tungumálaþorp á fót annars staðar. Frekari þorpsvæðing er fyrirhuguð í framtíðinni ef fjármagn fæst til verkefnisins.
Á Flateyri var gerð tilraun með íslenskukennsla í gegnum leiklist árið 2011 í tengslum við uppsetningu á leikritinu sköllótta söngkonan eftir Eugene Ionesco. Leiklistin býr yfir leiðum til að efla tjáningarfærni fólks og rjúfa félagslega einangrun sem margir innflytjendur búa við. Leikrit hvetur til samvinnu þar sem allir kraftar fá að njóta sín og árangurinn er sýnilegur.
Kristín R. Vilhjálmsdóttir, verkefnastjóri fjölmenningar hjá Borgarbóksafni Reykjavíkur, kynnti hin ýmsu fjölmenningarlegu ævintýri Borgarbókasafns. Heilahristingur er eitt verkefna Borgarbókasafns Reykjavíkur sem snýr að heimanámsaðstoð sem fram fer á Kringlusafni og Gerðubergssafni í samvinnu við sjálfboðaliða Reykjavíkurdeildar Rauða krossins. Menningarmót í leik-, grunn- og framhaldsskólum undir yfirskriftinni Fljúgandi teppi er þverfagleg kennsluaðferð sem er hugsuð til að varpa ljósi á mismunandi menningarheima nemenda. Ýmis önnur verkefni safnsins voru kynnt eins og Söguhringur kvenna kom að hönnun nýrra umbúða fyrir Kaffitár.
Markmið fjölmenningarlegra verkefna Borgarbókasafnsins eru að stuðla að gagnkvæmri félagslegri aðlögun, skilningi og virðingu, skapa vettvang fyrir menningar – og tungumálamiðlun, auka færni innflytjenda í íslensku, efla tengsl milli allra Reykvíkinga, skapa vettvang fyrir miðlun þekkingar um alla hópa samfélagsins, að bókasafnsheimsókn verði mikilvægur þáttur í daglegu lífi innflytjenda, rjúfa einangrun og efla samhygð með náunganum.
Helga Björt Möller, verkefnastjóri hjá Dalvíkurbyggð, kynnti söguskjóðuna sem byggir á hollenskri aðferðafræði. Söguskjóðan er foreldratengt verkefni á leikskólum með áherslu á þátttöku erlenda foreldra og málörvun barna. Markmiðin með söguskjóðunum er einkum að efla samstarf og samskipti við foreldra, styðja við að foreldrar með ólíkan bakgrunn kynnist og upplifi eitthvað sameiginlegt, styðja við íslenskukunnáttu erlendu foreldranna, stuðla að víðsýni og vinna gegn fordómum. Aðdragandi verkefnisins er sá að hjá Dalvíkurbyggð er fjölgun barna af erlendum uppruna í skólum sveitarfélagsins á síðustu árum. Söguskjóðan hefur stuðlað að aukinni þátttöku foreldra af erlendum uppruna í leikskólastarfinu .
Nýleg rannsókn á vegum Fjölmenningarsetursins sýnir aðeins 12% innflytjenda telja sig tala góða íslensku. 88 meta kunnáttu sína lakari. Aðeins 25% innflytjenda telja sig hafa starf við hæfi. 75% segjast ekki vera í starfi sem hæfir menntun og reynslu. Flestir svara því til að ónæg íslenskukunnátta ástæðan fyrir því að þau eru ekki í starfi sem hæfir þeirra menntun og reynslu. 76% svarenda telja skort á íslenskukunnáttu vera ástæður langtímaatvinnuleysi. Skort á enskukunnáttu nefna 18%, 26% nefna fordóma og 21% nefna erlent nafn. Þessar tölur sýna berlega hversu mikilvægt er að veita innflytjendum lykilinn að tungumálinu með öllum tiltækum ráðum.
- fimmtudagurinn 9. október 2014
-
