Gjöf til nemenda í smáskipanámi

Hópurinn með Sjómannabókina

Hraðfrystihúsið − Gunnvör h.f. gaf hverjum nemanda úr Grunnskólanum á Ísafirði, sem eru í smáskipanámi hjá Fræðslumiðstöðinni, Sjómannabókina eftir Pál Ægi Pétursson. Sjómannabókin er aðalkennslubókin í smáskipanáminu og tekur á flestu er varðar sjómennsku og skipstjórn á þessu stigi. Er þetta í annað sinn sem HG gefur grunnskólanemum þessa bók.

Fræðslumiðstöð Vestfjarða þakkar HG fyrir þessa góðu gjöf og vill segja við HG menn eins og Gunnar á Hlíðarenda forðum. Góðar eru gjafir þínar, en meira þykir mér verð vinátta þín.

Nemendur úr Grunnskólanum á Ísafirði hafa í nokkur ár getað tekið smáskipanám hjá Fræðslumiðstöðinni sem valgrein. Nú eru 14 nemendur í þessu námi.

Okkur á Fræðslumiðstöð Vestfjarða finnst gott að fá líf í húsið og sannarlega fylgir líf þessum indælu ungmennum. Enda eru þau alltaf auðfúsu gestir í okkar húsum.

Meðfylgjandi mynd var tekin af nemendum með bókina góðu, ásamt forstöðumanni og Guðbirni Páli Sölvasyni kennara. Það voru teknar allmargar myndir, enda nokkur vandi að fá alla til að horfa í myndavélina á sama tíma.

• þriðjudagurinn 29. september 2015

Lesblinduleiðrétting

Lambi

Áttu við sértæka erfiðleika með lestur eða ritun? Þá gæti verið gott hjá þér að hitta Lamba.

Lambi, sem heitir fullu nafni Jón Einar Haraldsson en notar aldrei það ágæta nafn, verður á ferð um Vestfirði nú í vikunni og kynnir aðferðir sem geta gagnast fólki sem á í sértökum erfiðleikum með:

• Lestur og stafsetningu (dyslexia).
• Rithönd (dysgraphia).
• Reikning (dyscalculia).
• Verklag (dyspraxia).
• Athygli og einbeitingu (ADD/ADHD).

Ef eitthvað af þessu á við þig sem lest þessa frétt, eða einhern sem þú þekkir, gæti verið gott fyrir þig að hitta Lamba.

Lambi tekur fólk í greiningar á öllum þessum sviðum og ef þú ert kominn af grunnskólaaldri eru þær þér að kostnaðarlausu.

Þeir sem geinast með einhvern af ofangreindum erfiðleikum eiga þess kost að taka námsskrána  Aftur í nám. Námskráin er 95 kennslustundir, bæði einstaklins- og hóptímar. Kennarar eru þeir Lambi og Sturla Kristjánsson sálfræðingur. Námið kostar 68 þúsund á hvern þátttakenda. Starfsmenntasjóðir stéttarfélaga endurgreiða oftast um 75% kostnaðar. Frekari upplýsingar og skráning í námið er hér.

Ef þú vilt kynna þér þetta betur eða hitta Lamba er síminn hjá honum 861 1785 og netfangið lambi@internet.is

Einnig hægt að fá upplýsingar hjá Fræðslumiðstöð Vestfjarða í síma 456 5025, eða með tölvupósti smari@frmst.is

• sunnudagurinn 20. september 2015