Félagsþjónustan í Ísafjarðarbæ

Margrét Geirsdóttir

Þátttakendur

« 1 af 2 »

Fimmtudaginn 14. apríl var 4. erindið í fyrirlestraröðinni um Þriðja skeiðið – réttindi og tækifæri.

Þá sagði Margrét Geirsdóttir sviðsstjóri fjölskyldusviðs frá félagsþjónustunni í Ísafjarðarbæ og lagði eðli málsins samkvæmt mesta áherslu á þjónustu við aldraða. Var erindi Margrétar einkar fróðlegt og skemmtilegt og spunnust fjörugar umræður undir fyrirlestrinum.

Haukur Ingibergsson formaður Landssambands eldri borgara var staddur á Ísafirði og heiðraði hann samkomuna með nærveru sinni.

Fyrirlesturinn fór fram hjá Fræðslumiðstöð Vestfjarða að Suðurgötu 12 á Ísafirði.

Næsta erindi í fyrirlestraröðinni verður fimmtudaginn 12. maí, en þá mun Dögg Árnadóttir lýðheilsufræðingur fjalla um lýðheilsu.

Glærurnar sem Margrét notaði má sjá hérna.

• föstudagurinn 15. apríl 2016

Námskeið um núvitund - vel heppnuð byrjun á samstarfi Fræðslumiðstöðvarinnar og BHM

« 1 af 2 »

Síðastliðinn þriðjudag, 12. apríl, var haldið mjög vel heppnað námskeið um núvitund hjá Fræðslumiðstöð Vestfjarða. Kennari á námskeiðinu var Bryndís Jóna Jónsdóttir, margreyndur núvitundarkennari.

Núvitundarnámskeið hafa verið afar vinsæl á höfuðborgarsvæðinu undanfarin misseri en illa gengið að koma á slíku hér fyrir vestan þrátt fyrir ítrekaðar fyrirspurnir. Á endanum var leitað til stéttarfélagsins BHM sem hefur verið að bjóða sínum félagsmönnum að fræðast um núvitund. Og viti menn, þar á bæ var tekið vel í að gera tilraun með samstarf á þann veg að BHM útvegaði kennara og biði sínu fólki og Fræðslumiðstöðin fengi að auglýsa námskeiðið fyrir aðra.

Í stuttu máli tókst þetta vonum framar. Alls voru 34 sem sóttu námskeiðið, þar af þrjár konur á Patreksfirði og fjórar á Hólmavík. Mun þetta líklega vera í fyrsta skipti sem hugleiðsla hefur farið fram í gegnum fjarfundabúnað hjá Fræðslumiðstöð Vestfjarða, en stutt hugleiðsla var ein af þeim æfingum sem kynnt var fyrir þátttakendum. Þátttakendur á námskeiðinu eru án efa betur meðvitaðir um mikilvægi þess að vera hér og nú, að njóta líðandi stundar og veita henni athygli og láta ekki gærdaginn eða verkefni morgundagsins trufla daginn í dag.

Það er von okkar hjá Fræsðumiðstöðinni að þetta verði upphafið að farsælu samstarfi milli miðstöðvarinnar og BHM og í framtíðinni verði hægt að bjóða upp á fleiri námskeið fyrir aðildarfélaga en jafnframt að hafa þau opin öðrum.  

• föstudagurinn 15. apríl 2016
• Dagný Sveinbjörnsdóttir