Þriðja skeiðið - réttindi og tækifæri – Mataræði og hreyfing

Salome Elín Ingólfsdóttir

Sigríður Lára Gunnlaugsdóttir

« 1 af 2 »

Fimmtudagskvöldið 13. október, kl. 17 – 19 verður 8. erindið í fyrirlestraröðinni um Þriðja skeiðið – réttindi og tækifæri.

Í erindinu munu þær Salome Elín Ingólfsdóttir næringarfræðingur og Sigríður Lára Gunnlaugsdóttir sjúkraþjálfari fjalla um mikilvægi þess að leggja inn fyrir góðri heilsu og að geta nýtt sér þann sjóð til að bæta lífi við árin. Mataræði og hreyfing eru tengdir þættir þegar kemur að heilsunni og inniheldur erindið hugmyndir af skrefum í átt að heilbrigði og til viðhalds góðrar heilsu út lífið.

Fyrirlestraröðinni Þriðja skeiðið - réttindi og tækifæri er ætlað að kynna fólki sitthvað sem gott er að huga að fyrir framtíðina þegar komið er á miðjan aldur. Hún er því einkum ætluð fólki sem komið er á miðjan aldur, en allir eru velkomnir.

Erindin verða hjá Fræðslumiðstöð Vestfjarða að Suðurgötu 12 á Ísafirði, en verði þátttakendur á Hólmavík eða Patreksfirði verður notaður fjarfundabúnaður til að tengja fólk saman.

Tími: Fimmtudagurinn 13. október kl. 17-19.

Verð: 1.000 kr. á mann.

• fimmtudagurinn 6. október 2016

Hljóðvist, skrifstofunám, franska, vefnaður, bókhald og jákvæðni!

Það er kannski ekki margt sem hljóðvist í húsum, skrifstofustörf, franska, vefnaður, bókhald og jákvæðni í lífi og starfi eiga beint sameiginlegt annað en að þetta eru allt viðfangsefni sem tekin verða fyrir á námskeiðum Fræðslumiðstöðvarinnar á næstunni.

Miðstöðin er nú að senda út blöðung í öll hús á norðanverðum Vestfjörðum þar sem kynnt eru næstu námskeið. Þar kennir ýmissa grasa eins og upptalningin hér að ofan gefur til kynna. Það ættu því flestir að geta fundið eitthvað við hæfi hvort sem það tengist því að eflast í starfi, styrkja sig sem einstaklingur eða bara löngun til þess að gera eitthvað áhugavert og skemmtilegt.

Starfsfólk Fræðslumiðstöðvarinnar vill ítreka mikilvægi þess að áhugasamir skrái sig, það er fátt leiðinlegra en að fella niður námskeið vegna ónógra skráninga en svo mæta óskráðir á auglýstum degi og grípa í tómt.

Þá má enn og aftur minna á starfsmenntasjóði stéttarfélaganna. Flest félög styrkja sitt fólk með endurgreiðslu á hluta af þátttökugjöldum námskeiða og eru allir hvattir til að kanna rétt sinn og nýta hann.

• föstudagurinn 23. september 2016
• Dagný Sveinbjörnsdóttir