Sigurrós Júlíusdóttir og Smári Haraldsson
Sigurrós Júlíusdóttir kom færandi hendi í Fræðslumiðstöðina í morgun og afhenti miðstöðinni bókagjöf.
Annars vegar var það íslensk orðabók í vandaðri tveggja binda útgáfu bókaútgáfunnar Eddu og hins vegar stór og vönduð kortabók, Jörðin í öllu sínu veldi, sem Mál og menning gaf út.
Við hjá Fræðslumiðstöð Vestfjarða erum afskaplega glöð með þessar gjafir og ekki síður þakklát fyrir þann hlýhug sem þær sýna til miðstöðvarinnar. Það er okkar mjög mikilvægt að vita um velvilja fólksins á Vestfjörðum og finna að það stendur við bakið á okkur.
Á meðfylgjandi mynd er forstöðumaður að veita gjöfinni viðtöku.
- mánudagurinn 20. febrúar 2017
-
Samstarfið innsiglað með handabandi.
Föstudaginn 10. febrúar s.l. var undirritaður samstarfssamningur milli Fræðslumiðstöðvar Vestfjarða og Hagvangs ehf.
Með samninginum lýsa aðilar vilja sínum til nánara samstarfs um þjónustu við fyrirtæki og stofnanir á Vestfjörðum. Fræðslumiðstöðin hefur boðið aðstoð við greiningu fræðsluþarfa og gerð fræðsluáætlana og Hagvangur hefur verið að hasla sér völl við margskonar ráðgjöf og þjálfun.
Vilji samningsaðila er að efla markaðsstarf sitt á Vestfjörðum og bjóða fyrirtækjum og stofnunum meiri og betri þjónustu.
Á meðfylgjandi mynd innsigla þau Katrín S. Óladóttir framkvæmdastjóri Hagvangs og Smári Haraldsson forstöðumaður Fræðslumiðstöðvar Vestfjarða samstarfið með handabandi. Í baksýn eru vottar að atburðinum; þau Elfa Svanhildur Hermannsdóttir verðandi forstöðumaður Fræðslumiðstöðvarinnar og Guðjón Svansson ráðgjafi hjá Hagvangi, en þau munu bera hita og þunga af framkvæmd samningsins.
- mánudagurinn 13. febrúar 2017
-
