17 konur útskrifast úr meðferð matvæla

Nemendurnir 17 ásamt Salome sem kenndi námið.

Náminu lauk með veitingum sem þátttakendur útbjuggu eftir að hafa aukið hollustu uppskrifta.

« 1 af 2 »

Frá því í lok október hefur hópur kvenna frá Ísafirði, Bolungarvík, Flateyri og Suðureyri mætt í Fræðslumiðstöð Vestfjarða einu sinni í viku og lært um meðferð matvæla hjá Salome Elínu Ingólfsdóttur næringarfræðingi. 

Meðal þess sem þær hafa fræðst um er gæði og öryggi í meðferð matvæla, matvælavinnsla, geymsluþol, merkingar á umbúðum, hollusta máltíða, ofnæmi og óþol og fæðuflokkar. Í lok námsins fengu konurnar það skemmtilega verkefni að finna mataruppskriftir, breyta þeim á einhvern þann hátt sem gæti aukið hollustu og útbúa svo samkvæmt því. Náminu lauk svo með útskrift þann 10. febrúar s.l. þar sem veitingarnar voru afrakstur verkefnisins.

Meðferð matvæla er 60 kennslustunda nám kennt eftir námsskrá frá Fræðslumiðstöð atvinnulífsins og styrkt af Fræðslusjóði.

Starfsfólk Fræðslumiðstöðvarinnar óskar konunum til hamingju með áfangann og er þess fullvisst að þær hafi haft bæði gagn og gaman að.

• föstudagurinn 13. febrúar 2015
• Dagný Sveinbjörnsdóttir

Hlífðargassuða - hagnýtt nám

Nemendur og kennarar við útskrift úr hlífðargassuðu í maí 2014.

Fræðslumiðstöðin býður nú í annað skipti upp á nám í hlífðargassuðu og er fyrirhugað að hefja það þann 17. febrúar. Námið er samstarfsverkefni Fræðslumiðstöðvarinnar, Menntaskólans á Ísafirði og 3X Technology ehf og kennt samkvæmt námskrá sem þessir aðilar þróuðu í sameiningu.

Námið er ætlað fólki sem hefur hug á að vinna í framleiðslufyrirtækjum við hlífðargassuðu með sérstakri áherslu á ryðfrítt stál og er bæði verklegt og bóklegt, alls 138 kennslustundir.

• föstudagurinn 6. febrúar 2015
• Dagný Sveinbjörnsdóttir