Þátttakendur í raunfærnimat.
Í janúar fóru fjórtán starfsmenn frá Hólmadrangi á Hólmavík og Drangi á Drangsnesi í gegnum raunfærnimat í fisktækni. Með raunfærnimatinu var verið að meta þá þekkingu og færni sem fólk hefur aflað sér í gegnum tíðina á móti tilteknum áföngum í fisktækninámi sem Fisktækniskóli Íslands kennir. Raunfærnimatið getur leitt til styttingar á námi þar sem nemendur þurfa þá ekki að taka þá áfanga sem þeir fá metna.
Mánudaginn 23. febrúar komu þátttakendur saman í fundarsal Hólmadrangs til þess að taka við viðurkenningum fyrir matið og þiggja léttar veitingar í tilefni dagsins. Það er óhætt að segja að raunfærnimatið hafi komið vel út og mun stytta þátttakendunum leiðina í gegnum fisktækninámið. Nú er verið að skipuleggja framhaldið og er gert ráð fyrir að þátttakendur geti lokið fisktæknináminu í heimabyggð ýmist með fjarkennslu eða kennslu á staðnum.
Raunfærnimatið er afrakstur af verkefni um hækkað menntunarstig í Norðvesturkjördæmi sem Fræðslumiðstöð Vestfjarða átti aðild að. Námið í framhaldi er samvinnuverkefni Fræðslumiðstöðvarinnar, Fisktækniskólans og Menntaskólans á Ísafirði.
- föstudagurinn 27. febrúar 2015
- Dagný Sveinbjörnsdóttir
Þótt alltaf sé lögð áhersla á fjölbreytni í námskeiðsframboði hjá Fræðslumiðstöð Vestfjarða þá gerist það stundum, alveg óvart, að sjá má ákveðið þema. Stundum er mikið framboð af tölvunámskeiðum, stundum virðast tungumálin ráðandi o.s.frv. Nú í mars ættu þeir sem vilja rækta sinn innri mann og efla sig í samskiptum, hvort sem er í einkalífi eða starfi, að geta fundið eitthvað við hæfi.
Mánudaginn 9. mars hefst námskeið í hugrænni atferlismeðferð (HAM) en þar er fjallað um aðferðir sem hafa reynst vel við að takast á við vandamál daglegs lífs. Þessar aðferðir nýtast líka vel þegar fólk finnur fyrir vanlíðan eins og t.d. kvíða eða depurð, gengur í gegnum erfiða lífsreynslu eða samskipti við annað fólk veldur vandræðum. Námskeiðið er ekki hugsað sem meðferðarúrræði en tilvalið fyrir alla þá sem vilja kynna sér út á hvað hugræn atferlismeðferð gengur.
Fimmtudaginn 12. mars er fyrirhugað námskeið sem nefnist leiðtogafærni. Námskeiðið er ætlað öllum þeim sem vilja efla sig í leiðtogahlutverkinu hvort sem er í vinnu eða félagsstörfum. Markmið námskeiðsins er að veita nemendum innsýn í helstu þætti sem stuðla að velgengni leiðtoga á hagnýtan hátt. Á námskeiðinu verður m.a. fjallað um hlutverk leiðtogans og þær áskoranir sem leiðtogar standa frammi fyrir á 21. öld. Farið verður yfir lykilþætti varðandi persónulegra hæfni til að sinna leiðtogahlutverkinu, svo sem að þróa eigin stjórnunarstíl, að eiga árangursrík samskipti og að ná settum markmiðum. Þá verður farið yfir tengsl og árangursríkt samstarf og hvað einkennir leiðtoga, teymi og skipulagsheildir sem ná árangri.
Laugardaginn 14. mars er svo komið að sálrænum stuðningi en slíkt námskeið hefur verið haldið í samvinnu við Rauða krossinn nokkur undanfarin ár. Á námskeiðinu fræðast þátttakendur um gildi sálræns stuðnings í aðstæðum sem geta valdið áföllum. Þátttakendur læra að gera sér betur grein fyrir eðlilegum viðbrögðum fólks sem lendir í sársaukafullum aðstæðum og hvernig þeir geti veitt stuðning og umhyggju. Meðal viðfangsefna eru mismunandi tegundir áfalla, áhrif alvarlegra atvika á einstaklinginn, sálræn skyndihjálp, stuðningur við úrvinnslu alvarlegs atviks og sorg og sorgarferli.
Það er sem sagt af ýmsu að taka fyrir þá sem hafa áhuga á mannlegum samskiptum. Nú er bara að skrá sig!
- þriðjudagurinn 24. febrúar 2015
- Dagný Sveinbjörnsdóttir
