Fræðslumiðstöðin vill vekja athygli á málþinginu Vestfirska vorið sem haldið verður á Flateyri dagana 5. – 6. maí 2017, að Hafnarbakka 8, kaffistofu gamla hraðfrystihússins sem nú hýsir Ísfell hf. Málþingið er skipulagt af Perlum fjarðarins, Flateyri, félaginu Hús og fólk, Flateyri og fleiri heimamönnum í samvinnu við Háskólasetur Vestfjarða og Fræðslumiðstöð Vestfjarða.
Markmið málþingsins er vekja athygli á vestfirsku samfélagi og málefnum dreifðra byggða á Íslandi. Heimamenn, fræðimenn og gestir munu skiptast á skoðunum í von um að umræða er tæki mið af reynsluheimi íbúa dreifðra byggða, þekkingu og sýn fræðimanna muni efla skilning á stöðu mála, viðfangsefnum og hugsanlegum úrræðum. Spurt verður hvort hægt sé að snúa núverandi byggðaþróun við þar sem ljóst sé að ef fram fer sem horfir muni margar sjávarbyggðir á Íslandi ekki ná vopnum sínum og jafnvel leggjast af.
Þrír fræðimenn munu flytja erindi á málþinginu en allir hafa þeir fjallað um byggðaþróun, hver frá sínum fræðasviði. Þeir eru dr. Guðmundur Hálfdánarson, sagnfræðingur og prófessor við Háskóla Íslands, dr. Kristinn Hermannsson, hagfræðingur og lektor við Háskólann í Glasgow og dr. Þóroddur Bjarnason, félagsfræðingur og prófessor við Háskólann á Akureyri.
Heimamenn á Flateyri munu einnig fjalla um stöðu mála út frá reynslu og rannsóknum og eru það þau Jóhanna G. Kristjánsdóttir, menntunarfræðingur, Kristján Torfi Einarsson, sjómaður og útgerðarmaður og Sæbjörg Freyja Gísladóttir, þjóðfræðingur.
Öllum áhugasömum um efni málþingsins er velkomið að hlýða á erindin meðan húsrúm leyfir en þeir eru beðnir um að skrá sig til að geta áætlað fjölda þátttakenda. Nánari upplýsingar og skráning hjá Jóhönnu Kristjánsdóttur í síma 4567626 / 8642943 eða með tölvupósti á netfangið: johanna@snerpa.is
- miðvikudagurinn 3. maí 2017
- Dagný Sveinbjörnsdóttir
Það er mikið um að vera hjá Fræðslumiðstöðinni í maí. Mörg spennandi námskeið eru framundan og flestir ættu að geta fundið eitthvað við sitt hæfi.
Fyrst má nefna fjögur stutt námskeið fyrir ferðaþjónustufyrirtæki sem miðast að því að þjálfa starfsfólk og vekja það til umhugsunar um starf sitt í þjónustukeðjunni. Námskeiðin fjalla um meðhöndlun matvæla, mikilvægi hreinlætis, þrif og þjónustu.
Nú í vor verður Fræðslumiðstöðin með fjögur endurmenntunarnámskeið fyrir bílstjóra í vöruflutningum og farþegaflutningum í atvinnuskyni. Atvinnubílstjórum með ökuréttindi í flokkum C1, C, D1 og D er gert að sækja 35 kennslustunda endurmenntun á fimm ára fresti. Þeir bílstjórar sem fengið hafa réttindi sín fyrir 10. september 2013 þurfa að ljúka endurmenntun fyrir 10. september 2018. Fræðslumiðstöðin hefur fengið viðurkenningu frá Samgöngustofu til þess að bjóða upp á þessa endurmenntun og er það skemmtileg viðbót við námskeiðaflóruna hjá okkur.
Í samstarfi við fræðslusetrið Starfsmennt verður boðið upp á frítt námskeið um stjórnun álags og streitu fyrir þá sem greiða í SFR, VerkVest og Verkalýðs- og Sjómannafélag Bolungarvíkur. Námskeiðið verður 17. maí og leiðbeinandi er Ingrid Kuhlmann. Skráningar fara í gegnum Starfsmennt í síma 550-0060. Aðrir eru velkomnir en greiða þá fullt námskeiðsgjald.
Bandalag Háskólamanna mun bjóða upp á námskeið eða vinnustofu um framsækni og öruggri tjáningu í samstarfi við Fræðslumiðstöðina þann 11. maí. Leiðbeinandi á námskeiðinu er hin landsþekkta Sigríður Arnardóttir, betur þekkt úr þáttunum Fólk með Sirrý. Námskeiðið er frítt fyrir þá sem greiða í BHM en aðrir greiða fullt þátttökugjald. Skráning fer fram í gegnum heimasíðu eða síma Fræðslumiðstöðvarinnar.
Við vonum að allir geti fundið eitthvað við sitt hæfi áður en fólk heldur í sumarfrí eða í sumarvinnuna. Einnig tökum við glöð við öllum ábendingum um skemmtileg námskeið.
- fimmtudagurinn 27. apríl 2017
-
