Útskrift úr Námi og þjálfun í almennum bóklegum greinum
Þann 5. júní sl. var glatt á hjalla hjá Fræðslumiðstöð Vestfjarða þegar hluti þess hóps sem í vetur hefur lagt stund á Nám og þjálfun í almennum bóklegum greinum hittist til að halda upp á námslokin.
Nám og þjálfun í almennum bóklegum greinum er 300 kennslustunda námsleið þar sem kennt er eftir námskrá frá Fræðslumiðstöð atvinnulífsins. Námið var haldið í samstarfi við Menntaskólann á Ísafirði og geta nemendur fengið einingar metnar á móti grunnáföngum við skólann. Þá lagði Menntaskólinn til húsnæði til kennslunnar.
Nám og þjálfun í almennum bóklegum greinum er hentugt fyrir fullorðið fólk sem stefnir að iðnnámi og hefur ekki lokið bóklegum greinum í framhaldsskóla og fyrir fólk sem fengið hefur raunfærnimat og stefnir á áframhaldandi nám í sínu fagi. Námið er líka gott fyrir þá sem ekki hafa verið í skóla í langan tíma en langar að komast aftur af stað í námi.
Innan námsleiðarinnar kenndi Emil Ingi Emilsson íslensku, Björgvin Bjarnason kenndi stærðfræði, Solveig Edda Vilhjálmsdóttir sá um enskukennslu, Rúnar Helgi Haraldsson kenndi upplýsingatæknni og Helga Konráðdóttir sá um námstækni auk þess að hafa umsjón með náminu í heild.
Fræðslumiðstöðin óskar nemendunum til hamingju með veturinn og vonar að sem flestir þeirra haldi áfram í námi af einhverju tagi.
