Þátttakendur ásamt Auði Ólafsdóttur kennara og Smára Haraldssyni forstöðumanni Fræðslumiðstövarinnar.

Miðvikudaginn 21. janúar útskrifuðust átta konur konur sem starfa hjá Heilbrigðisstofnun Vestfjarða á Þingeyri eftir 120 kennslustunda nám hjá Fræðslumiðstöð Vestfjarða, en námið hófst í byrjun október. Þessar vösku konur hafa lagt sig mikið fram við námið og stundað það af kappi. Í tilefni útskriftarinnar gerðu þær sér glaðan dag og borðuðu saman enda búnar að vinna fyrir því. Fræðslumistöðin óskar þeim til hamingju með að hafa lokið þessum áfanga.

Námið á Þingeyri samanstóð af tveimur námsskrám frá Fræðslumiðstöð atvinnulífsins. Annars vegar Meðferð matvæla sem er 60 kennslustunda nám þar sem meðal annars er fjallað um gæði og öryggi í meðferð matvæla, matvælavinnslu, geymsluþol, merkingar á umbúðum, hollustu máltíða, ofnæmi og óþol og fæðuflokkana. Kennari var Salome Elín Ingólfsdóttir næringarfræðingur. Hins vegar var 60 kennslustunda nám sem kallast Þjónustuliðar – grunnnám en meðal námsþátta þar eru líkamsbeiting, smitgát, öryggismál, þjónusta, sótthreinsun, ræsting og skyndihjálp. Megin þungi kennslunnar í þjónustuliðanáminu var á herðum Auðar Ólafsdóttur hjúkrunarfræðings og Hörpu Guðmundsdóttur iðjuþjálfa en aðrir kennarar komu einnig að kennslunni.

Náminu var komið á í góðri samvinnu við Heilbrigðisstofnun Vestfjarða og er í raun til fyrirmyndar um hvernig fyrirtæki og stofnanir geta stutt starfsfólk sitt til þess að sækja sér aukna þekkingu og eflst þannig í starfi.  Þetta er afrakstur verkefnis um hækkað menntunarstig í Norðvestur kjördæmi sem Fræðslumiðstöðin hefur átt aðild að undanfarið eitt og hálft ár.